තිස්සෙම යකඩ ගොඩකට වී තැම්බෙන වා
දෙපා ගෙවෙන තුරු වැඩටම ඇවිදින වා
කැන්ටිමේ කෑම දැකලා බඩ දන වා
තැනකට එන්න මම රස්සාවට යන වා
ඕ. ටී. එක අරං බෝඩිමට ගෙ වා
පඩියෙන් බාගයක් කෑමට වෙන් කර වා
ඉතිරි ටිකෙන් අනෙකුත් වියදම් පිය වා
මාසේ අන්තිමට මට මොකවත් නැතු වා
ලාබෙට ලැබෙන සීසන් එක තියන් අ තේ
බස් එකෙ,කෝච්චියෙ තෙරපී වැඩට එ තේ
රතු ඉර වදින්නට පෙර පැමිණීමෙ පො තේ
බස් නැවතුමේ සිට අපි මැරතන් දුව තේ
මානෙන් ඉන්න ලොක්කන්ගේ රැවුං බැනු ං
සොක්කෝ ඉඳන් කරනා පොඩි පොඩි විගඩ ං
වැඩ බැරි දාසලාගේ වැදි බණ අහමි ං
ගෙවිලා යනව කන්තෝරුවෙ දවස හෙමි ං
වැඩ්ඩෝ කෙරුවාව ගැන පංපෝරි කෙ ලී
වැඩක් කරන්නට යනවිට කෙනේහි ලී
කබ්බන්ගේ ටොයියන්ගේ කඹ ඇදි ලී
බලා හිඳිනවා අපි බැඳගෙන ඇඟි ලී
එක කට්ටියක් නැහෙනා මුළු දවස පු රා
පත්තර කියවනව පිරිසක් අසුන් අ රා
තව ටික දෙනෙක් හට හිතුනම බොන්න සු රා
පනිනව කන්තෝරුවෙන් සිකුරිටිට හො රා
කාලය කමින් රත් කරමින් නොඉඳ පු ටු
ලිපි ගොණු එක්ක හොඳ හැටි වෙනවා ඔට් ටු
ලොක්කෝ බනිනකොට අප කරනට මට් ටු
අහගෙන ඉන්නවා කෑව වගෙ පිට් ටු
වැඩ ඇති වෙලාවටනං නෑ අනම් මන ම්
කන්තෝරුවෙ කරන්නට වැඩ ඕන තර ම්
හවස් අතේ විවේකයක් ලැබුනම න ම්
අපි ගහනවා කොම්පියුටර් එකෙන් ගේ ම්
හිත හොඳ අහිංසක යහපත් මිනිසුන් ද
කෙලෙහි ගුණ නොදත් නරි වන් කපටින් ද
නයින් කටුස්සන් ආඳන් ඇඹලුන් ද
හරියට සිටී කන්තෝරුවෙ සෙනග මැ ද
විවිදාකාරයේ මිනිසුන් සමග හි ඳ
ජීවත් වෙන අයුරු ඉගෙනුම අවැසි ස ඳ
මොනවද කියා දැන ගන්නට නරක හො ඳ
තෝතැන්නකි සාර, කන්තෝරුව නිබ ඳ
_____
පින්තූරය
http://www.glasbergen.com/wp-content/gallery/computer-cartoons/bizcom81.gif
